Sin categoría

O reitor da Universidade da Coruña, Julio Abalde, reuniuse o pasado 18 de febreiro coa comunidade universitaria –profesorado, persoal de administración e servizos e estudantado- da Facultade de Socioloxía, xunto coa vicerreitora de Campus de Ferrol e Responsabilidade Social, Araceli Torres, a vicerreitora de Internacionalización e Cooperación, Pilar García de la Torre, e o vicerreitor de Política Científica, Investigación e Transferencia, Salvador Naya.

A decana de Socioloxía, Raquel Martínez, quixo poñer en antecedentes ao equipo de goberno de Abalde sobre algúns dos proxectos que a facultade está a realizar en sintonía cos campus de especialización, tanto co de Sustentabilidade como no de Innova, así como no programa da UDC Green Campus para fomentar a calidade de vida do persoal e do alumnado, neste sentido avanzou un cambio nas máquinas de vending que contarán con produtos saudables, así como a incorporación na UDC dunha dietista que faga máis sanos os menús dos comedores, cun 60% de comida saudable. A decana avanzou tamén outras medidas de mellora da facultade como a reformulación do plan de acción titorial coa implicación do alumnado, así como do Traballo Fin de Grao no que introduciron un Premio Extraordinario. Martínez adiantou un plan de fomento das prácticas en empresas estranxeiras para o que están xa establecendo os contactos oportunos. O reitor felicitou ao equipo decanal e a toda a facultade por estas iniciativas.

A Facultade de Socioloxía e a Concellería de Xustiza Social e Coidados organizaron a  a primeira edición das xornadas A Coruña coidadora. Novas formas de atención entre o público e o común, celebradas os días 22 e 23 de novembro, unha iniciativa aberta a toda a cidadanía que pretende abordar os retos, posibilidades e oportunidades que se enmarcan no ámbito dos coidados e da dependencia e que se presentan tanto desde a perspectiva institucional como o privado e comunitario.

A actividade “Obradoiro de Naturezas Híbridas”, celebrado o pasado mes de outubro co alumnado da Facultad de Socioloxía e da Facultade de Ciencias da Comunicación, tivo como obxectivo fundamental explorar formas de aprendizaxe activo que permitisen abordar e comprender problemas complexos por parte do noso alumnado. O obradoiro estivo centrado nas “naturezas urbanas” da cidade da Coruña. Mediante unha aproximación interdisciplinar entre as Ciencias Sociais, as Ciencias Medioambientais e as Ciencias da Comunicación, perseguíase que o alumnado se enfrentara a dificultade de comprender e analizar a relación entre a natureza, sociedade e cidade. Organizamos unha xornada de debate-saída-debate que tivo como destino uns dos espazos híbridos emblemáticos da ciudade da Coruña: O Monte de San Pedro e o Parque de Bens.